is dukh ka tamannai banata na use main

is dukh kā tamannā.ī banātā na use maiñ

ai kaash kabhī dil se lagātā na use maiñ

ham 'ishq se puure nahīñ hote the vagarna

duniyā vo kabhī mujh ko dikhātā na use maiñ

taḳhlīq yahāñ bā'is-e-takmīl-e-ḳhalā hai

varna na ḳhudā mujh ko banātā na use maiñ

bas qurb se bujhtī hai kahāñ aag badan kī

sote hue varna to jagātā na use maiñ

donoñ hī suḳhan-fahm haiñ donoñ ko hai ye mauj

yuuñ hī vo ġhazal mujh ko sunātā na use maiñ

be-vaj.h tavaqqo' hī nahīñ rahtī kisī se

bhātī na kabhī vo mujhe bhātā na use maiñ

is dukh ka tamannai banata na use main

ai kash kabhi dil se lagata na use main

hum 'ishq se pure nahin hote the wagarna

duniya wo kabhi mujh ko dikhata na use main

taKHliq yahan ba'is-e-takmil-e-KHala hai

warna na KHuda mujh ko banata na use main

bas qurb se bujhti hai kahan aag badan ki

sote hue warna to jagata na use main

donon hi suKHan-fahm hain donon ko hai ye mauj

yun hi wo ghazal mujh ko sunata na use main

be-wajh tawaqqo' hi nahin rahti kisi se

bhati na kabhi wo mujhe bhata na use main