اس جور و جفا سے ترے زنہار نہ ٹوٹے

اس جور و جفا سے ترے زنہار نہ ٹوٹے

یہ دل تو کسی طرح سے اے یار نہ ٹوٹے

غیروں کو نہ کر مجھ دل بسمل کے مقابل

چو رنگ لگاتے تری تلوار نہ ٹوٹے

وہ شیشۂ دل ہے کہ اسی سنگ جفا پر

سو بار اگر پھینکیے یک بار نہ ٹوٹے

رکھ قیس قدم وادئ لیلیٰ میں سمجھ کر

اس دشت محبت کا کوئی خار نہ ٹوٹے

جنبش میں نہ لا سبحۂ اسلام کو اے شیخ

نازک ہے مرا رشتۂ زنار نہ ٹوٹے

شانہ سے فغاںؔ پھر الجھتا ہے مرا دل

اس کاکل مشکیں کا کوئی تار نہ ٹوٹے