uski shabahat kisi shams-o-qamar mein nahin

us kī shabāhat kisī shams-o-qamar meñ nahīñ

ek use dekh kar koī nazar meñ nahīñ

qāsid zohra maqām kah use merā salām

jis kā nasheman mirī rāhguzar meñ nahīñ

kyā kashish jazb-e-dil tujh meñ kamī hai ki vo

mehvar-e-sayyārgāñ tere asar meñ nahīñ

chashm-e-sitārā-shumār kushta-sadā intizār

diid kī koī naved najm-e-sahar meñ nahīñ

ham jo dikhāte nahīñ lāla-o-gul kī tarah

ye na samajhnā koī daaġh jigar meñ nahīñ

sabz qabā-e-chaman sirf fareb-e-nazar

aas kī koñpal kisī shāḳh-e-shajar meñ nahīñ

ek tujhī ko 'sabā' kyuuñ hai thakan kā gilā

mauja-e-gul aur havā kaun safar meñ nahīñ

us ki shabahat kisi shams-o-qamar mein nahin

ek use dekh kar koi nazar mein nahin

qasid zohra maqam kah use mera salam

jis ka nasheman meri rahguzar mein nahin

kya kashish jazb-e-dil tujh mein kami hai ki wo

mehwar-e-sayyargan tere asar mein nahin

chashm-e-sitara-shumar kushta-sada intizar

did ki koi nawed najm-e-sahar mein nahin

hum jo dikhate nahin lala-o-gul ki tarah

ye na samajhna koi dagh jigar mein nahin

sabz qaba-e-chaman sirf fareb-e-nazar

aas ki konpal kisi shaKH-e-shajar mein nahin

ek tujhi ko 'saba' kyun hai thakan ka gila

mauja-e-gul aur hawa kaun safar mein nahin