اس راہ طلب میں میں اے دل جاتا ہوں کہاں معلوم نہیں

اس راہ طلب میں میں اے دل جاتا ہوں کہاں معلوم نہیں

اپنا بھی پتہ معلوم نہیں منزل کا نشاں معلوم نہیں

ہم لاکھ چھپائیں گے اے دل اس جذب محبت کو لیکن

اے جوش جنوں پھر آتی ہے کیوں لب پہ فغاں معلوم نہیں

باتیں کچھ ان سے ایسی ہوئیں ہم عقل و خرد سب کھو بیٹھے

قصہ کو بیاں کرنے کے لئے انداز بیاں معلوم نہیں

سمجھا تھا بہاریں ہی ہوں گی گلشن میں ہمیشہ چاروں طرف

شاید کہ تجھے برق لرزاں انداز‌ خزاں معلوم نہیں

اللہ رے شوق گل بوسی اتنا بھی نہیں ہے مجھ کو پتہ

کانٹوں میں الجھ کر بھی خوش ہے کیوں میری زباں معلوم نہیں

ہر بار بھلاؤں میں لیکن اے روئے حسیں زلف مشکیں

جاتا ہے دل پر شوق طلب کیوں سوئے بتاں معلوم نہیں

آہوں سے اسے تسکین نہیں اشکوں سے نسیمؔ اب چین نہیں

کیا چیز بھلا پھر چاہتا ہے یہ قلب تپاں معلوم نہیں