is sabab se meri taqdir tere hath mein hai

is sabab se mirī taqdīr tire haath meñ hai

hai mire paañv meñ zanjīr tire haath meñ hai

niiñd merī na kisī niiñd kī rāhat merī

ḳhvāb hai ḳhvāb kī tā'bīr tire haath meñ hai

mujh se bar-vaqt 'ibādāt kī tafsīl na pūchh

merī 'ujlat mirī tāḳhīr tire haath meñ hai

terī marzī mire jis naqsh ko jaisā kar de

ai musavvir mirī tasvīr tire haath meñ hai

kāmyābī hī mirī hai na koī nākāmī

merī koshish mirī tadbīr tire haath meñ hai

baiTh kar merī hathelī pe kahā jugnū ne

ab to ik nuur kī jāgīr tire haath meñ hai

vaar karnā tire dushman kī hai fitrat 'āsim'

na koī Dhaal na shamshīr tire haath meñ hai

is sabab se meri taqdir tere hath mein hai

hai mere panw mein zanjir tere hath mein hai

nind meri na kisi nind ki rahat meri

KHwab hai KHwab ki ta'bir tere hath mein hai

mujh se bar-waqt 'ibaadat ki tafsil na puchh

meri 'ujlat meri taKHir tere hath mein hai

teri marzi mere jis naqsh ko jaisa kar de

ai musawwir meri taswir tere hath mein hai

kaamyabi hi meri hai na koi nakaami

meri koshish meri tadbir tere hath mein hai

baiTh kar meri hatheli pe kaha jugnu ne

ab to ek nur ki jagir tere hath mein hai

war karna tere dushman ki hai fitrat 'asim'

na koi Dhaal na shamshir tere hath mein hai