اس سبب سے مری تقدیر ترے ہاتھ میں ہے

اس سبب سے مری تقدیر ترے ہاتھ میں ہے

ہے مرے پاؤں میں زنجیر ترے ہاتھ میں ہے

نیند میری نہ کسی نیند کی راحت میری

خواب ہے خواب کی تعبیر ترے ہاتھ میں ہے

مجھ سے بر وقت عبادات کی تفصیل نہ پوچھ

میری عجلت مری تاخیر ترے ہاتھ میں ہے

تیری مرضی مرے جس نقش کو جیسا کر دے

اے مصور مری تصویر ترے ہاتھ میں ہے

کامیابی ہی مری ہے نہ کوئی ناکامی

میری کوشش مری تدبیر ترے ہاتھ میں ہے

بیٹھ کر میری ہتھیلی پہ کہا جگنو نے

اب تو اک نور کی جاگیر ترے ہاتھ میں ہے

وار کرنا ترے دشمن کی ہے فطرت عاصمؔ

نہ کوئی ڈھال نہ شمشیر ترے ہاتھ میں ہے