اس سے پہلے کہ رائیگاں ہو جاؤں

اس سے پہلے کہ رائیگاں ہو جاؤں

لکھ رہا ہوں کہ کچھ بیاں ہو جاؤں

اس کا ہو کر ہوں حد میں ورنہ تو میں

کیا پتہ ہے کہاں کہاں ہو جاؤں

تو کہے تو جہاں ہوں میں نہ رہوں

پھر جہاں حکم دے وہاں ہو جاؤں

چھوڑ دے دوست چھیڑ مت مجھ کو

زخم ہوں یہ نہ ہو نشاں ہو جاؤں

دیکھتا ہوں دل و دماغ کی جنگ

سوچتا ہوں کہ درمیاں ہو جاؤں

تیرا ہونا مرے یقین سے ہے

اور اگر میں ہی بد گماں ہو جاؤں

اک سرے پر جنوں سلگتا رہے

اک طرف میں دھواں دھواں ہو جاؤں