اس شہر بے وفا سے شریک وفا نہ مانگ

اس شہر بے وفا سے شریک وفا نہ مانگ

مرزا یہاں تو اپنے لیے صاحبا نہ مانگ

یہ مشورہ ہے میرا ابھی دل ربا نہ مانگ

ہو جائے گا غرور تجھے آئنہ نہ مانگ

یہ راہ بندگی ہے اسے سہل مت سمجھ

دنیا کی گر طلب ہے تجھے تو خدا نہ مانگ

ہم نے تجھے ہمیشہ سر آنکھوں پہ ہے رکھا

غیروں کے دل میں اپنے لیے تو جگہ نہ مانگ

وہ ہے سبب مرض کا میاں چارہ گر نہیں

اس زہر دینے والے سے کوئی دوا نہ مانگ

جو دے رہا ہے غم وہی خوشیوں کی وجہ تھا

اس کے لیے خدا سے کوئی بھی سزا نہ مانگ

نظروں سے مے پلانا تو احسان تھا ترا

مجھ سے کوئی حساب مرے ساقیا نہ مانگ

دریا میں تو بہا دے سبھی نیکیاں امتؔ

اچھائیوں کا اپنی کسی سے صلہ نہ مانگ