is tarah se bazm mein li usne angDai ki bas

is tarah se bazm meñ lī us ne añgḌā.ī ki bas

ho ga.e shaiḳh-e-haram bhī aise shaidā.ī ki bas

mai-kade par is tarah kaalī ghaTā chhā.ī ki bas

toḌ dī tauba tabī'at aisī lalchā.ī ki bas

dil pe rakkhe haath ham pahroñ use dekhā kiye

bānu-e-shab yuuñ sitāroñ se thī gahnā.ī kī bas

har taraf majbūriyāñ dushvāriyāñ mahrūmiyāñ

zindagī kuchh aise nāzuk moḌ pe laa.ī ki bas

reza-reza ho gayā pal bhar meñ hastī kā vujūd

choT aisī ham ne rāh-e-'ishq meñ khaa.ī ki bas

ek nāgin kī tarah lamha-ba-lamha dosto

mujh ko aisī Das rahī thī shām-e-tanhā.ī ki bas

shashdar-o-hairān haiñ sun kar ġhazal ahl-e-suḳhan

fikr meñ 'ġhaibī' tirī hai aisī gahrā.ī kī bas

is tarah se bazm mein li us ne angDai ki bas

ho gae shaiKH-e-haram bhi aise shaidai ki bas

mai-kade par is tarah kali ghaTa chhai ki bas

toD di tauba tabi'at aisi lalchai ki bas

dil pe rakkhe hath hum pahron use dekha kiye

banu-e-shab yun sitaron se thi gahnai ki bas

har taraf majburiyan dushwariyan mahrumiyan

zindagi kuchh aise nazuk moD pe lai ki bas

reza-reza ho gaya pal bhar mein hasti ka wujud

choT aisi hum ne rah-e-'ishq mein khai ki bas

ek nagin ki tarah lamha-ba-lamha dosto

mujh ko aisi Das rahi thi sham-e-tanhai ki bas

shashdar-o-hairan hain sun kar ghazal ahl-e-suKHan

fikr mein 'ghaibi' teri hai aisi gahrai ki bas