اس طرح دل ہے داغ تمنا لئے ہوئے

اس طرح دل ہے داغ تمنا لئے ہوئے

جیسے کلیم ہوں ید بیضا لئے ہوئے

آئے تو کوئی طور کا جلوہ لیے ہوئے

بیٹھے ہیں ہم بھی چشم تماشا لئے ہوئے

لطف یقین وعدۂ فردا نہ پوچھئے

بس جی رہے ہیں ایک سہارا لئے ہوئے

آنکھوں میں اشک دل میں خلش اور جگر میں داغ

اٹھے ہیں بزم ناز سے کیا کیا لئے ہوئے

خلوت میں ہم کو سیر دو عالم نصیب ہے

اپنی نظر ہے بزم تماشا لئے ہوئے

یہ جلوہ گاہ حشر کہاں اور ہم کہاں

آئے ہیں صرف تیری تمنا لئے ہوئے

رنگ تضاد گلشن ہستی نہ پوچھئے

کانٹا ہے پھول پھول ہے کانٹا لئے ہوئے

یوں اس کی یاد ہے دل صد چاک میں مرے

جس طرح نے ہے سینے میں نغمہ لئے ہوئے

بدنام زندگی کو مبشرؔ نہ کیجیے

پھرتے ہیں آپ حسرت رسوا لئے ہوئے