is waqt kuchh ajib ghazal ki uDan hai

is vaqt kuchh 'ajīb ġhazal kī uḌaan hai

kaisī abhī zamīn abhī āsmān hai

kyā dekhtā huuñ pūchh lo mujh se vagarna phir

dīvār huuñ ki aañkh nahīñ sirf kaan hai

nekī badī ke donoñ farishte haiñ bad-havās

dar jhoñpaḌe kā band khulā āsmān hai

isbāt kuchh to mahr-e-mohabbat kā chāhiye

hoñToñ pe ab bhī us ke laboñ kā nishān hai

mumkin hai kal havelī nazar aa.e yā khañDar

jab tak havā kī zad pe Tikā hai makān hai

tanqīd kā bhī toḌ ke dekhā hai password

jo ham-navā hai us pe bahut mehrbān hai

ik dost haath dho ke hai pīchhe paḌā huā

kirdār-kush nahīñ hai magar bad-gumān hai

is waqt kuchh 'ajib ghazal ki uDan hai

kaisi abhi zamin abhi aasman hai

kya dekhta hun puchh lo mujh se wagarna phir

diwar hun ki aankh nahin sirf kan hai

neki badi ke donon farishte hain bad-hawas

dar jhonpaDe ka band khula aasman hai

isbaat kuchh to mahr-e-mohabbat ka chahiye

honTon pe ab bhi us ke labon ka nishan hai

mumkin hai kal haweli nazar aae ya khanDar

jab tak hawa ki zad pe Tika hai makan hai

tanqid ka bhi toD ke dekha hai password

jo ham-nawa hai us pe bahut mehrban hai

ek dost hath dho ke hai pichhe paDa hua

kirdar-kush nahin hai magar bad-guman hai