اس وقت کچھ عجیب غزل کی اڑان ہے

اس وقت کچھ عجیب غزل کی اڑان ہے

کیسی ابھی زمین ابھی آسمان ہے

کیا دیکھتا ہوں پوچھ لو مجھ سے وگرنہ پھر

دیوار ہوں کہ آنکھ نہیں صرف کان ہے

نیکی بدی کے دونوں فرشتے ہیں بد حواس

در جھونپڑے کا بند کھلا آسمان ہے

اثبات کچھ تو مہر محبت کا چاہیے

ہونٹوں پہ اب بھی اس کے لبوں کا نشان ہے

ممکن ہے کل حویلی نظر آئے یا کھنڈر

جب تک ہوا کی زد پہ ٹکا ہے مکان ہے

تنقید کا بھی توڑ کے دیکھا ہے پاسورڈ

جو ہم نوا ہے اس پہ بہت مہربان ہے

اک دوست ہاتھ دھو کے ہے پیچھے پڑا ہوا

کردار کش نہیں ہے مگر بد گمان ہے