ishaara kar ke ye kahte hain mujhse u kya hai

ishāra kar ke ye kahte haiñ mujh se uu kyā hai

namāz-e-'ishq meñ hotā nahīñ vuzū kyā hai

sitam to dekhiye chhoḌā zamāna jis ke liye

vo kah rahā hai mujhe aaj ye ki tū kyā hai

vo jāntā hai mirī hasratoñ ke baare meñ

magar ye pūchh rahā hai ki aarzū kyā hai

jahāñ bhī dekhnā bas saḳht baat kah denā

tumhārī shoḳh-mizājī hai yā ki ḳhū kyā hai

qabā.eñ apnī sañbhālo tumheñ nazar na lage

hamāre chāk-e-garebān ko rafū kyā hai

farīq donoñ biThā.e the sāmne apne

to phir batāo nā anjām-e-guftugū kyā hai

tavāf kartī jo rahtī hai mere chehre kā

tumhārī chashm-e-pareshāñ ko justujū kyā hai

tavāf karnā ho maqsad tirī galī kā jise

to us ke vāste sardī hai aur lū kyā hai

sifāt laakh hoñ 'e'jāz' us meñ kyā hāsil

bujhā sake na agar pyaas aabjū kyā hai

ishaara kar ke ye kahte hain mujh se u kya hai

namaz-e-'ishq mein hota nahin wuzu kya hai

sitam to dekhiye chhoDa zamana jis ke liye

wo kah raha hai mujhe aaj ye ki tu kya hai

wo jaanta hai meri hasraton ke bare mein

magar ye puchh raha hai ki aarzu kya hai

jahan bhi dekhna bas saKHt baat kah dena

tumhaari shoKH-mizaji hai ya ki KHu kya hai

qabaen apni sanbhaalo tumhein nazar na lage

hamare chaak-e-gareban ko rafu kya hai

fariq donon biThae the samne apne

to phir batao na anjam-e-guftugu kya hai

tawaf karti jo rahti hai mere chehre ka

tumhaari chashm-e-pareshan ko justuju kya hai

tawaf karna ho maqsad teri gali ka jise

to us ke waste sardi hai aur lu kya hai

sifat lakh hon 'e'jaz' us mein kya hasil

bujha sake na agar pyas aabju kya hai