ishq dariya hai giran-bar na jaane koi

ishq dariyā hai girāñ-bār na jaane koī

bahte paanī ko gunahgār na jaane koī

is meñ rūhoñ kī mulāqāt huā kartī hai

ḳhvāb ke pyaar ko be-kār na jaane koī

maiñ jo hālāt ke dhāre meñ bahī jaatī huuñ

mujh ko lahroñ kā taraf-dār na jaane koī

sar jhukāyā hai mohabbat meñ mohabbat ke liye

is mohabbat ko mirī haar na jaane koī

maiñ yūñhī vaqt-guzārī ko chalī aa.ī huuñ

mujh ko ḳhvāboñ kā ḳharīdār na jaane koī

mujh ko hālāt kī talḳhī ne kiyā hai barham

merī guftār ko talvār na jaane koī

yaad aate hī ġhazal bantī hai merī 'bilqīs'

sā.at-e-hijr ko āzār na jaane koī

ishq dariya hai giran-bar na jaane koi

bahte pani ko gunahgar na jaane koi

is mein ruhon ki mulaqat hua karti hai

KHwab ke pyar ko be-kar na jaane koi

main jo haalat ke dhaare mein bahi jati hun

mujh ko lahron ka taraf-dar na jaane koi

sar jhukaya hai mohabbat mein mohabbat ke liye

is mohabbat ko meri haar na jaane koi

main yunhi waqt-guzari ko chali aai hun

mujh ko KHwabon ka KHaridar na jaane koi

mujh ko haalat ki talKHi ne kiya hai barham

meri guftar ko talwar na jaane koi

yaad aate hi ghazal banti hai meri 'bilqis'

saat-e-hijr ko aazar na jaane koi