ishq karne ka irada ho to humse milna

ishq karne kā irāda ho to ham se milnā

tum ko ḳhud se kabhī milnā ho to ham se milnā

qābil-e-dīd haiñ sab zaḳhm hamāre dil ke

aap ko shauq-e-tamāshā ho to ham se milnā

sāya-e-gul meñ mulāqāt rahegī tum se

mausam-e-gul meñ jo tanhā ho to ham se milnā

be-sabab ham bhī kisī se nahīñ milte sāhab

tum bhī milne kī tamannā ho to ham se milnā

va.ada-e-vasl to lete nahīñ tum se lekin

ittifāqan idhar aanā ho to ham se milnā

apnī āñkhoñ ke liye ḳhvāb kahāñ furqat meñ

ḳhvāb tum ne koī dekhā ho to ham se milnā

apnā dar sab pe khulā hai koī apnā ho ki ġhair

kisī darvesh se milnā ho to ham se milnā

ishq karne ka irada ho to hum se milna

tum ko KHud se kabhi milna ho to hum se milna

qabil-e-did hain sab zaKHm hamare dil ke

aap ko shauq-e-tamasha ho to hum se milna

saya-e-gul mein mulaqat rahegi tum se

mausam-e-gul mein jo tanha ho to hum se milna

be-sabab hum bhi kisi se nahin milte sahab

tum bhi milne ki tamanna ho to hum se milna

wada-e-wasl to lete nahin tum se lekin

ittifaqan idhar aana ho to hum se milna

apni aankhon ke liye KHwab kahan furqat mein

KHwab tum ne koi dekha ho to hum se milna

apna dar sab pe khula hai koi apna ho ki ghair

kisi darwesh se milna ho to hum se milna