ishq ke waste hai dil ki aaD

ishq ke vāste hai dil kī aaḌ

koī dekhe ye til kī oT pahāḌ

sar-kashī vaj.h-e-iftiḳhār nahīñ

qad meñ shamshād se baḌā hai taaḌ

satyanās ho gayā dil kā

ishq ne ḳhuub kī ukhāḌ-pachhāḌ

vo ḳhudā jaane ghar meñ haiñ ki nahīñ

kuchh khulā aur kuchh hai band kivāḌ

hasrateñ ba.ad-e-marg jaa.eñ kahāñ

dafn kar mujh ko aur inheñ bhī gaaḌ

nā-tavāñ dil uThā.e kyā ġham-e-ishq

ik taraf raa.ī ek samt pahāḌ

merī taqdīr kā mire dil kā

un ke hāthoñ meñ hai banāv bigāḌ

ḳhaak merī bhī us meñ shāmil hai

apne dāman se gard-e-rāh na jhaaḌ

māl-o-zar de diyā hasīnoñ ko

rah gayā ghar meñ sirf kāTh-kabāḌ

kaash uTh jaa.e parda-e-hastī

mere aur us ke biich meñ hai ye aaḌ

shola-e-ġham se dil kā haal ye hai

jaise pahlū meñ jal rahā ho bhaaḌ

chaar din vo banāv rakhte haiñ

aur rakhte haiñ aaTh roz bigāḌ

vo nahīñ to mirī nigāh meñ hai

baaġh vīrān aur shahr ujaaḌ

raḳht-e-hastī ke ho chuke TukḌe

ai junūñ ab mire kafan ko phaaḌ

'nūh' tūfān-e-hijr-e-ulfat meñ

koh-e-jūdī kī DhūñDte haiñ aaḌ

ishq ke waste hai dil ki aaD

koi dekhe ye til ki oT pahaD

sar-kashi wajh-e-iftiKHar nahin

qad mein shamshad se baDa hai taD

satyanas ho gaya dil ka

ishq ne KHub ki ukhaD-pachhaD

wo KHuda jaane ghar mein hain ki nahin

kuchh khula aur kuchh hai band kiwaD

hasraten baad-e-marg jaen kahan

dafn kar mujh ko aur inhen bhi gaD

na-tawan dil uThae kya gham-e-ishq

ek taraf rai ek samt pahaD

meri taqdir ka mere dil ka

un ke hathon mein hai banaw bigaD

KHak meri bhi us mein shamil hai

apne daman se gard-e-rah na jhaD

mal-o-zar de diya hasinon ko

rah gaya ghar mein sirf kaTh-kabaD

kash uTh jae parda-e-hasti

mere aur us ke bich mein hai ye aaD

shola-e-gham se dil ka haal ye hai

jaise pahlu mein jal raha ho bhaD

chaar din wo banaw rakhte hain

aur rakhte hain aaTh roz bigaD

wo nahin to meri nigah mein hai

bagh viran aur shahr ujaD

raKHt-e-hasti ke ho chuke TukDe

ai junun ab mere kafan ko phaD

'nuh' tufan-e-hijr-e-ulfat mein

koh-e-judi ki DhunDte hain aaD