عشق کیا کیا نہ رقیب سر و ساماں نکلا

عشق کیا کیا نہ رقیب سر و ساماں نکلا

ٹائی کالر کی جگہ چاک گریباں نکلا

ذکر پتلون کا کیا ایک لنگوٹی بھی نہیں

قیس تصویر کے پردے میں بھی عریاں نکلا

اس نے چپل سے سر راہ تواضع کر دی

اب تو ارمان ترا اے دل ناداں نکلا

کس قدر جلد ہوا مرحلۂ عقد بھی طے

سخت مشکل ہے کہ یہ کام بھی آساں نکلا

میری آہیں ہوں کہ اغیار کے سگریٹ کا دھواں

جو تری بزم سے نکلا سو پریشاں نکلا

بارک اللہ یہ احسان کفن چوروں کا

صور پھنکنا تھا کہ میں قبر سے عریاں نکلا

اک پھٹا بوریا اک جام شکستہ ہاشمؔ

بعد مرنے کے مرے گھر سے یہ ساماں نکلا