ishq mein barbaad hone ke siwa rakkha na tha

ishq meñ barbād hone ke sivā rakkhā na thā

ġham ko sahne ke alāva koī bhī chāra na thā

yaad rah rah kar kisī kī hai satātī raat bhar

sub.h hote bhuul jaanā ye tujhe sheva na thā

ye tirī ulfat mujhe rakhtī hai betābī meñ gum

ye sabhī ko thī ḳhabar lekin koī charchā na thā

ā.īna dekhūñ to kyuuñ tū hī nazar aa.e mujhe

boltā hai kyā tirā chehra mere jaisā na thā

din guzar jaatā hai duniyā kī masāfat meñ magar

raat hī ik imtihāñ hai jis kā andāza na thā

raat kī tanhā.iyāñ āġhosh meñ le kar mujhe

pūchhtī haiñ kyā kabhī tanhā.iyāñ dekhā na thā

kyā mohabbat vo nasha hai maiñ zarā jānūñ 'nisār'

zindagī meñ is tarah pahle kabhī bahkā na thā

ishq mein barbaad hone ke siwa rakkha na tha

gham ko sahne ke alawa koi bhi chaara na tha

yaad rah rah kar kisi ki hai satati raat bhar

subh hote bhul jaana ye tujhe shewa na tha

ye teri ulfat mujhe rakhti hai betabi mein gum

ye sabhi ko thi KHabar lekin koi charcha na tha

aaina dekhun to kyun tu hi nazar aae mujhe

bolta hai kya tera chehra mere jaisa na tha

din guzar jata hai duniya ki masafat mein magar

raat hi ek imtihan hai jis ka andaza na tha

raat ki tanhaiyan aaghosh mein le kar mujhe

puchhti hain kya kabhi tanhaiyan dekha na tha

kya mohabbat wo nasha hai main zara jaanun 'nisar'

zindagi mein is tarah pahle kabhi bahka na tha