ishq mein imkan ki had se guzarta kaun hai

ishq meñ imkān kī had se guzartā kaun hai

ohda-e-mansūr par puurā utartā kaun hai

aa.ine se jhuuT bulvāne kā hai ye ehtimām

ham se milne ke liye bantā sañvartā kaun hai

ik musalmāñ ko but-e-kāfir kahā kartā huuñ maiñ

jā.iye kah dījiye duniyā se Dartā kaun hai

log kahte haiñ ki jaarī hai mukāfāt-e-amal

ham ne bhī dekhā hai kartā kaun bhartā kaun hai

kaun kartā hai ḳhatā-e-ijtihādī āj-kal

āsmān-e-faḳhr se nīche utartā kaun hai

maiñ nahīñ huuñ gar vo dīvāna to phir is najd se

sar hathelī par liye aksar guzartā kaun hai

sang-dil se shīsha-e-dil aao Takrāte haiñ aaj

dekhte haiñ kāñch kī sūrat bikhartā kaun hai

majma.a-e-tesha-garāñ ham ne bhī dekhā hai 'shahāb'

jaan dene ko to sab kahte haiñ martā kaun hai

ishq mein imkan ki had se guzarta kaun hai

ohda-e-mansur par pura utarta kaun hai

aaine se jhuT bulwane ka hai ye ehtimam

hum se milne ke liye banta sanwarta kaun hai

ek musalman ko but-e-kafir kaha karta hun main

jaiye kah dijiye duniya se Darta kaun hai

log kahte hain ki jari hai mukafat-e-amal

hum ne bhi dekha hai karta kaun bharta kaun hai

kaun karta hai KHata-e-ijtihadi aaj-kal

aasman-e-faKHr se niche utarta kaun hai

main nahin hun gar wo diwana to phir is najd se

sar hatheli par liye aksar guzarta kaun hai

sang-dil se shisha-e-dil aao Takraate hain aaj

dekhte hain kanch ki surat bikharta kaun hai

majma-e-tesha-garan hum ne bhi dekha hai 'shahab'

jaan dene ko to sab kahte hain marta kaun hai