ishq mein koi zaman aur na makan hota hai

ishq meñ koī zamāñ aur na makāñ hotā hai

vo do-ālam se alag ek jahāñ hotā hai

kis qadar un kī tabī.at pe garāñ hotā hai

jis fasāne meñ vafāoñ kā bayāñ hotā hai

shiddat-e-shauq kā allāh re fusūñ uf re fareb

un kī nafrat pe mohabbat kā gumāñ hotā hai

sirf ik dil hī vo ma.abad hai vo ik ma.abad-e-ishq

jis meñ nāqūs ham-āvāz-e-azāñ hotā hai

un se is tarah judā ho ke ham aa.e haiñ ki haa.e

aañkh se jaise koī ashk ravāñ hotā hai

husn ke haq se koī ohda-bar-ā kyā hogā

ishq kā haq bhī adā ham se kahāñ hotā hai

apnī sozish meñ bhī hotā hai jahannum mahsūs

ġhair kī aag kā sho.ala bhī dhuāñ hotā hai

sunñe vaale hī pe hai munhasir andāza-e-ġham

varna jo haal hai vo kis se bayāñ hotā hai

ġhair kī aag meñ jalne kā maza hai kuchh aur

varna parvāna bhī ḳhud sho.ala-ba-jāñ hotā hai

haa.e is ishq meñ insāñ kā javāñ mar jaanā

jaise kambaḳht isī din ko javāñ hotā hai

saath har saañs ke aatā hai zabāñ par tirā naam

dil meñ jo kuchh ho vahī vird-e-zabāñ hotā hai

jis janāze pe barastī huī hasrat dekhūñ

us janāze pe mujhe apnā gumāñ hotā hai

ishq meñ haa.e tabī.at kā vo aalam 'bismil'

ālam-e-ishq bhī jab dil pe garāñ hotā hai

ishq mein koi zaman aur na makan hota hai

wo do-alam se alag ek jahan hota hai

kis qadar un ki tabiat pe garan hota hai

jis fasane mein wafaon ka bayan hota hai

shiddat-e-shauq ka allah re fusun uf re fareb

un ki nafrat pe mohabbat ka guman hota hai

sirf ek dil hi wo mabad hai wo ek mabad-e-ishq

jis mein naqus ham-awaz-e-azan hota hai

un se is tarah juda ho ke hum aae hain ki hae

aankh se jaise koi ashk rawan hota hai

husn ke haq se koi ohda-bar-a kya hoga

ishq ka haq bhi ada hum se kahan hota hai

apni sozish mein bhi hota hai jahannum mahsus

ghair ki aag ka shoala bhi dhuan hota hai

sunne wale hi pe hai munhasir andaza-e-gham

warna jo haal hai wo kis se bayan hota hai

ghair ki aag mein jalne ka maza hai kuchh aur

warna parwana bhi KHud shoala-ba-jaan hota hai

hae is ishq mein insan ka jawan mar jaana

jaise kambaKHt isi din ko jawan hota hai

sath har sans ke aata hai zaban par tera nam

dil mein jo kuchh ho wahi wird-e-zaban hota hai

jis janaze pe barasti hui hasrat dekhun

us janaze pe mujhe apna guman hota hai

ishq mein hae tabiat ka wo aalam 'bismil'

aalam-e-ishq bhi jab dil pe garan hota hai