isi tarah uga tha aur isi tarah se Dhal gaya

isī tarah ugā thā aur isī tarah se Dhal gayā

ye aaj bhī yuuñ hī gayā kī jis tarah se kal gayā

jo mahv-e-fikr-e-zīst haiñ unheñ bhalā ye kyā ḳhabar

tulūa maah kab huā kab āftāb Dhal gayā

tamām ahl-e-bazm lab-kushā se ho gayā haiñ kyuuñ

ye āḳhir aisā kyā mirī zabān se nikal gayā

jo kar rahā thā āftāb ko nichoḌne kī baat

bas ik shuā ke lams se vo mom se pighal gayā

jo pūchhā ik faqīr se safar kā āḳhirī maqām

qadam kī ḳhaak uThā ke vo mirī jabīñ pe mal gayā

kisī kī aah zehn par asar kuchh aisā kar ga.ī

mirā tamām dard-e-dil suḳhan meñ hī badal gayā

tū tark nisbateñ nasīb se to kar rahā hai par

bulandiyoñ se paañv gar kabhī tirā phisal gayā

hai kis qadar mizāj udaas pattharoñ kā dekhiye

koī to hai jo rāste pe gir ke phir sambhal gayā

malāl kī to duur tak umiid mujh ko kyā rahe

jab us ke zehn se mirā ḳhayāl hī nikal gayā

isi tarah uga tha aur isi tarah se Dhal gaya

ye aaj bhi yun hi gaya ki jis tarah se kal gaya

jo mahw-e-fikr-e-zist hain unhen bhala ye kya KHabar

tulua mah kab hua kab aaftab Dhal gaya

tamam ahl-e-bazm lab-kusha se ho gaya hain kyun

ye aaKHir aisa kya meri zaban se nikal gaya

jo kar raha tha aaftab ko nichoDne ki baat

bas ek shua ke lams se wo mom se pighal gaya

jo puchha ek faqir se safar ka aaKHiri maqam

qadam ki KHak uTha ke wo meri jabin pe mal gaya

kisi ki aah zehn par asar kuchh aisa kar gai

mera tamam dard-e-dil suKHan mein hi badal gaya

tu tark nisbaten nasib se to kar raha hai par

bulandiyon se panw gar kabhi tera phisal gaya

hai kis qadar mizaj udas pattharon ka dekhiye

koi to hai jo raste pe gir ke phir sambhal gaya

malal ki to dur tak umid mujh ko kya rahe

jab us ke zehn se mera KHayal hi nikal gaya