itna aahista kabhi KHwab-e-sahar TuTta hai

itnā āhista kabhī ḳhvāb-e-sahar TūTtā hai

jis tarah niiñd kī golī kā asar TūTtā hai

toḌnā haath baḌhā kar hī nahīñ hai lāzim

pak chukā ho to havā se bhī samar TūTtā hai

aa.ina jhāñk rahā hai mire andar shāyad

is taraf 'aks ubhartā hai udhar TūTtā hai

nashsha-e-mai ke utarte bhī taḌaptā hai badan

kis aziyyat se magar nashsha-e-zar TūTtā hai

shahr-e-dil meñ bhī ka.ī zalzale aate haiñ magar

koī dīvār hī girtī hai na dar TūTtā hai

zulm baḌh jaa.e to rahtī nahīñ qudrat ḳhāmosh

ham samajhte to nahīñ qahr magar TūTtā hai

log be-his haiñ ki mātam nahīñ karte 'āsim'

shahr meñ roz koī dast-e-hunar TūTtā hai

itna aahista kabhi KHwab-e-sahar TuTta hai

jis tarah nind ki goli ka asar TuTta hai

toDna hath baDha kar hi nahin hai lazim

pak chuka ho to hawa se bhi samar TuTta hai

aaina jhank raha hai mere andar shayad

is taraf 'aks ubharta hai udhar TuTta hai

nashsha-e-mai ke utarte bhi taDapta hai badan

kis aziyyat se magar nashsha-e-zar TuTta hai

shahr-e-dil mein bhi kai zalzale aate hain magar

koi diwar hi girti hai na dar TuTta hai

zulm baDh jae to rahti nahin qudrat KHamosh

hum samajhte to nahin qahr magar TuTta hai

log be-his hain ki matam nahin karte 'asim'

shahr mein roz koi dast-e-hunar TuTta hai