jagta aur jagmagata shahr suna ho gaya

jāgtā aur jagmagātā shahr suunā ho gayā

yaad kyā us shaḳhs kī aa.ī maiñ tanhā ho gayā

raat paḌhne meñ huiiñ mashġhūl āñkheñ is qadar

niiñd ne jab un pe dastak dī saverā ho gayā

husn kā paiġhām laa.ī sub.h kī pahlī kiran

saarā manzar dasht-o-dariyā kā rupahlā ho gayā

chun liyā jis ko parindoñ ne basere ke liye

ḳhud-baḳhud is peḌ kā saaya ghanerā ho gayā

aarzū ūñchā.iyāñ chhūne kī thī jis shaḳhs ko

ek din itnā huā ūñchā ki tanhā ho gayā

soch kī tabdīliyoñ kī gard jab is par paḌī

rafta rafta pairahan lafzoñ kā mailā ho gayā

sāda-dil logoñ ke jazboñ ko ubhārā is tarah

ham-navā 'manzar' mirā saarā qabīla ho gayā

jagta aur jagmagata shahr suna ho gaya

yaad kya us shaKHs ki aai main tanha ho gaya

raat paDhne mein huin mashghul aankhen is qadar

nind ne jab un pe dastak di sawera ho gaya

husn ka paigham lai subh ki pahli kiran

sara manzar dasht-o-dariya ka rupahla ho gaya

chun liya jis ko parindon ne basere ke liye

KHud-baKHud is peD ka saya ghanera ho gaya

aarzu unchaiyan chhune ki thi jis shaKHs ko

ek din itna hua uncha ki tanha ho gaya

soch ki tabdiliyon ki gard jab is par paDi

rafta rafta pairahan lafzon ka maila ho gaya

sada-dil logon ke jazbon ko ubhaara is tarah

ham-nawa 'manzar' mera sara qabila ho gaya