jam-o-subu sharab un aankhon ka dekhna

jām-o-subū sharāb un āñkhoñ kā dekhnā

maḳhmūr ḳhvāb ḳhvāb un āñkhoñ kā dekhnā

dekhā bas ek pal ki mirī 'umr kaT ga.ī

be-pāyāñ be-hisāb un āñkhoñ kā dekhnā

vo dekhte haiñ jab to haTāte nahīñ nazar

Tuk sūrat-e-kitāb un āñkhoñ kā dekhnā

un bā-hayā nigāhoñ se kaise nigah mile

kartā hai aab aab un āñkhoñ kā dekhnā

dekhā kareñ vo māh-e-mukammal ko naaz se

sah legā māhtāb un āñkhoñ kā dekhnā

vo dekhte haiñ jaise mujhe dekhte na hoñ

dhoka hai yā sarāb un āñkhoñ kā dekhnā

kartī hai aañkh jazb-e-darūñ āshkār yuuñ

kartā hai be-hijāb un āñkhoñ kā dekhnā

detā hai vo sukūñ jo miTā Daale har jalan

saaya hai yā sahāb un āñkhoñ kā dekhnā

mahke hai tan-badan jo paḌe vo nigāh-e-nāz

mahkā.e yuuñ gulāb un āñkhoñ kā dekhnā

hosh-o-ḳhirad kahāñ jo nazar bhar ke dekh leñ

dekhā nahīñ janāb un āñkhoñ kā dekhnā

dekheñ vo jis ghaḌī maiñ sanā-e-ḳhudā karūñ

mere liye savāb un āñkhoñ kā dekhnā

'nasrīn' kah diyā jo sar-e-bazm hāl-e-dil

ho kyoñ na pur-hijāb un āñkhoñ kā dekhnā

jam-o-subu sharab un aankhon ka dekhna

maKHmur KHwab KHwab un aankhon ka dekhna

dekha bas ek pal ki meri 'umr kaT gai

be-payan be-hisab un aankhon ka dekhna

wo dekhte hain jab to haTate nahin nazar

Tuk surat-e-kitab un aankhon ka dekhna

un ba-haya nigahon se kaise nigah mile

karta hai aab aab un aankhon ka dekhna

dekha karen wo mah-e-mukammal ko naz se

sah lega mahtab un aankhon ka dekhna

wo dekhte hain jaise mujhe dekhte na hon

dhoka hai ya sarab un aankhon ka dekhna

karti hai aankh jazb-e-darun aashkar yun

karta hai be-hijab un aankhon ka dekhna

deta hai wo sukun jo miTa Dale har jalan

saya hai ya sahab un aankhon ka dekhna

mahke hai tan-badan jo paDe wo nigah-e-naz

mahkae yun gulab un aankhon ka dekhna

hosh-o-KHirad kahan jo nazar bhar ke dekh len

dekha nahin janab un aankhon ka dekhna

dekhen wo jis ghaDi main sana-e-KHuda karun

mere liye sawab un aankhon ka dekhna

'nasrin' kah diya jo sar-e-bazm haal-e-dil

ho kyon na pur-hijab un aankhon ka dekhna