جام و سبو شراب ان آنکھوں کا دیکھنا

جام و سبو شراب ان آنکھوں کا دیکھنا

مخمور خواب خواب ان آنکھوں کا دیکھنا

دیکھا بس ایک پل کہ مری عمر کٹ گئی

بے پایاں بے حساب ان آنکھوں کا دیکھنا

وہ دیکھتے ہیں جب تو ہٹاتے نہیں نظر

ٹک صورت کتاب ان آنکھوں کا دیکھنا

ان با حیا نگاہوں سے کیسے نگہ ملے

کرتا ہے آب آب ان آنکھوں کا دیکھنا

دیکھا کریں وہ ماہ مکمل کو ناز سے

سہہ لے گا ماہتاب ان آنکھوں کا دیکھنا

وہ دیکھتے ہیں جیسے مجھے دیکھتے نہ ہوں

دھوکہ ہے یا سراب ان آنکھوں کا دیکھنا

کرتی ہے آنکھ جذب دروں آشکار یوں

کرتا ہے بے حجاب ان آنکھوں کا دیکھنا

دیتا ہے وہ سکوں جو مٹا ڈالے ہر جلن

سایہ ہے یا سحاب ان آنکھوں کا دیکھنا

مہکے ہے تن بدن جو پڑے وہ نگاہ ناز

مہکائے یوں گلاب ان آنکھوں کا دیکھنا

ہوش و خرد کہاں جو نظر بھر کے دیکھ لیں

دیکھا نہیں جناب ان آنکھوں کا دیکھنا

دیکھیں وہ جس گھڑی میں ثنائے خدا کروں

میرے لیے ثواب ان آنکھوں کا دیکھنا

نسرینؔ کہہ دیا جو سر بزم حال دل

ہو کیوں نہ پر حجاب ان آنکھوں کا دیکھنا