jaan aise KHwabon se kis tarah chhuDaun main

jaan aise ḳhvāboñ se kis tarah chhuḌā.ūñ maiñ

shahr so gayā saarā ab kise jagā.ūñ maiñ

pā.emāl sabze par dekh kar gire patte

ab zamīn se ḳhud ko kis tarah uThā.ūñ maiñ

in akelī rātoñ meñ in akele rastoñ par

kis ke saath aa.uuñ maiñ kis ke saath jā.ūñ maiñ

ek hī sī tanhā.ī ek hī sā sannāTā

dasht kyā hai dil kyā hai kyā tujhe batā.ūñ maiñ

dekh kaise din aa.e dekh maiñ na kahtā thā

tū qarīb bhī aa.e aur tujhe bulā.ūñ maiñ

aaj sab meñ ghul-mil jā.ūñ mujh ko kyā ḳhabar kal tak

kis ko yaad aa.uuñ maiñ kis ko bhuul jā.ūñ maiñ

kitne kaam duniyā ne de diye mujhe 'ja.afar'

ashk-e-ġham girā.ūñ maiñ bār-e-ġham uThā.ūñ maiñ

jaan aise KHwabon se kis tarah chhuDaun main

shahr so gaya sara ab kise jagaun main

paemal sabze par dekh kar gire patte

ab zamin se KHud ko kis tarah uThaun main

in akeli raaton mein in akele raston par

kis ke sath aaun main kis ke sath jaun main

ek hi si tanhai ek hi sa sannaTa

dasht kya hai dil kya hai kya tujhe bataun main

dekh kaise din aae dekh main na kahta tha

tu qarib bhi aae aur tujhe bulaun main

aaj sab mein ghul-mil jaun mujh ko kya KHabar kal tak

kis ko yaad aaun main kis ko bhul jaun main

kitne kaam duniya ne de diye mujhe 'jafar'

ashk-e-gham giraun main bar-e-gham uThaun main