jaan-lewa hai pyar ka saya

jān-levā hai pyaar kā saaya

aap ke intizār kā saaya

aur detā hai mere ġham ko havā

ham-nashīñ ġham-gusār kā saaya

ho rahī hai jo aaj dil meñ chubhan

paḌ gayā hogā ḳhaar kā saaya

janm detā hai nuur vāloñ ko

tīrgī ke hisār kā saaya

dard bhar de diloñ meñ logoñ ke

hai sitamgar kahār kā saaya

duur kar de qarīb vāloñ ko

bartarī ke ḳhumār kā saaya

ruḳh badal de ḳhizāñ ke mausam kā

chhā.e jab bhī bahār kā saaya

naam raushan kare zamāne meñ

ilm-o-fan ke nikhār kā saaya

shaḳhsiyat ko zalīl kartā hai

jhūTe fan ke ġhubār kā saaya

nuur laa.e adab kī duniyā meñ

ban ke sūraj 'vaqār' kā saaya

jaan-lewa hai pyar ka saya

aap ke intizar ka saya

aur deta hai mere gham ko hawa

ham-nashin gham-gusar ka saya

ho rahi hai jo aaj dil mein chubhan

paD gaya hoga KHar ka saya

janm deta hai nur walon ko

tirgi ke hisar ka saya

dard bhar de dilon mein logon ke

hai sitamgar kahaar ka saya

dur kar de qarib walon ko

bartari ke KHumar ka saya

ruKH badal de KHizan ke mausam ka

chhae jab bhi bahaar ka saya

nam raushan kare zamane mein

ilm-o-fan ke nikhaar ka saya

shaKHsiyat ko zalil karta hai

jhuTe fan ke ghubar ka saya

nur lae adab ki duniya mein

ban ke suraj 'waqar' ka saya