jaan ye kah ke but-e-hosh-ruba ne le li

jaan ye kah ke but-e-hosh-rubā ne le lī

koī pūchhe to ye kahnā ki ḳhudā ne le lī

gul-e-maqsūd meñ avval to mahak thī hī nahīñ

aur jo thī bhī vo hasrat kī havā ne le lī

sab se pahle to siyāhī mirī qismat ko milī

jo bachī thī vo tirī zulf-e-dotā ne le lī

jaan kambaḳht mohabbat meñ bachā.e na bachī

but-e-kāfir se jo chhūTī to ḳhudā ne le lī

dam-e-āḳhir but-e-bedard kā dāman chhūTā

mere hāthoñ se baḌī chiiz ḳhudā ne le lī

chal basī jaan to is baat kā ġham kyā 'muztar'

ik amānat thī ḳhudā kī so ḳhudā ne le lī

jaan ye kah ke but-e-hosh-ruba ne le li

koi puchhe to ye kahna ki KHuda ne le li

gul-e-maqsud mein awwal to mahak thi hi nahin

aur jo thi bhi wo hasrat ki hawa ne le li

sab se pahle to siyahi meri qismat ko mili

jo bachi thi wo teri zulf-e-dota ne le li

jaan kambaKHt mohabbat mein bachae na bachi

but-e-kafir se jo chhuTi to KHuda ne le li

dam-e-aKHir but-e-bedard ka daman chhuTa

mere hathon se baDi chiz KHuda ne le li

chal basi jaan to is baat ka gham kya 'muztar'

ek amanat thi KHuda ki so KHuda ne le li