جانا چاہو تو کس نے روکا ہے

جانا چاہو تو کس نے روکا ہے

بن مرے جی سکو گے اچھا ہے

جب سے اس نے کہا خدا حافظ

تب سے سب کچھ دھواں دھواں سا ہے

آپ سے دھڑکنوں کی رونق ہے

دل مجھے آپ جیسا لگتا ہے

تم نہیں آئے ملنے ساون میں

بارشوں کا مزاج پھیکا ہے

یہ تو بس دل ہی جانتا ہے مرا

میں نے کس دل سے تجھ کو چھوڑا ہے

کل ہوا تھا گزر یہاں اس کا

شہر کا پانی کل سے میٹھا ہے

مجھ کو دنیا سمجھ میں کیا آتی

ایک ہی شخص کو جو سوچا ہے

خود سے بنتی نہیں کبھی اقراؔ

جانے کس بات کا یہ جھگڑا ہے