jaane kya jurm tha jis ki ye saza di gai hai

jaane kyā jurm thā jis kī ye sazā dī ga.ī hai

mujh ko is daur meñ jiine kī du'ā dī ga.ī hai

jurm ye hai ki uThāyā thā baġhāvat kā 'alam

mere jalte hue ḳheme ko havā dī ga.ī hai

ret par qadmoñ kī aahaT se bhī Dar jaatā huuñ

aaj is dasht meñ vahshat bhī baḌhā dī ga.ī hai

tum ko ik shahr-e-ḳhamoshāñ kī taraf jaanā hai

ḳhvāb meñ mujh ko yahī ek sadā dī ga.ī hai

nīm-shab mujh meñ taḌaptī hai koī nahr-e-furāt

mujh meñ vīrāne kī kuchh ḳhaak milā dī ga.ī hai

bach ke maqtal se jise jaanā hai jā saktā hai

sham’-e-ḳhema bhī sar-e-shām bujhā dī ga.ī hai

'āsif'-e-ḳhasta kī hijrat kā havāla de kar

'āsif'-e-ḳhasta kī mīrās luTā dī ga.ī hai

jaane kya jurm tha jis ki ye saza di gai hai

mujh ko is daur mein jine ki du'a di gai hai

jurm ye hai ki uThaya tha baghawat ka 'alam

mere jalte hue KHeme ko hawa di gai hai

ret par qadmon ki aahaT se bhi Dar jata hun

aaj is dasht mein wahshat bhi baDha di gai hai

tum ko ek shahr-e-KHamoshan ki taraf jaana hai

KHwab mein mujh ko yahi ek sada di gai hai

nim-shab mujh mein taDapti hai koi nahr-e-furaat

mujh mein virane ki kuchh KHak mila di gai hai

bach ke maqtal se jise jaana hai ja sakta hai

sham’-e-KHema bhi sar-e-sham bujha di gai hai

'asif'-e-KHasta ki hijrat ka hawala de kar

'asif'-e-KHasta ki miras luTa di gai hai