jaane kya soch ke ghar tak pahuncha

jaane kyā soch ke ghar tak pahuñchā

maiñ ki me.arāj-e-hunar tak pahuñchā

apne kashkol meñ hasrat le kar

ik gadāgar tire dar tak pahuñchā

dard uTThā thā mire pahlū meñ

āḳhir-e-kār jigar tak pahuñchā

ik tabāhī mire dil par utrī

ik tamāshā mire ghar tak pahuñchā

ik duā mere laboñ tak aa.ī

ik asar us kī nazar tak pahuñchā

jitnī aa.heñ mire dil se nikleñ

yā ḳhudā un ko asar tak pahuñchā

shāḳh se TuuTā huā pattā huuñ

tū mujhe mere shajar tak pahuñchā

ham sitāroñ kī ḳhabar lā.eñge

ye ḳhabar ahl-e-ḳhabar tak pahuñchā

jaane kya soch ke ghar tak pahuncha

main ki mearaj-e-hunar tak pahuncha

apne kashkol mein hasrat le kar

ek gadagar tere dar tak pahuncha

dard uTTha tha mere pahlu mein

aaKHir-e-kar jigar tak pahuncha

ek tabahi mere dil par utri

ek tamasha mere ghar tak pahuncha

ek dua mere labon tak aai

ek asar us ki nazar tak pahuncha

jitni aahen mere dil se niklen

ya KHuda un ko asar tak pahuncha

shaKH se TuTa hua patta hun

tu mujhe mere shajar tak pahuncha

hum sitaron ki KHabar laenge

ye KHabar ahl-e-KHabar tak pahuncha