jaane kya unki nazar kah gai diwanon ko

jaane kyā un kī nazar kah ga.ī dīvānoñ ko

apne hāthoñ se chhupā.e haiñ garebānoñ ko

zindagī ab mirī is tarh basar hotī hai

hasrateñ jāgīñ to niiñd aa ga.ī armānoñ ko

tang-dil kitne haiñ ab log zarā dekho to

pī ke ḳhud toḌ diyā karte haiñ paimānoñ ko

ik udāsī kā jo 'ālam hai hamāre ghar meñ

vo mayassar hai na sahrā na bayābānoñ ko

ye adā.eñ tirī bach bach ke guzarne kī jo haiñ

aur dīvāna na kar deñ tire dīvānoñ ko

aaj jo ġhair haiñ kal dost bhī ho sakte haiñ

itnī nafrat se na dekhā karo begānoñ ko

kyā Darā.eñgī use ġham kī havā.eñ 'arshad'

jis ne siine meñ chhupā rakkhā ho tūfānoñ ko

jaane kya un ki nazar kah gai diwanon ko

apne hathon se chhupae hain garebanon ko

zindagi ab meri is tarh basar hoti hai

hasraten jagin to nind aa gai armanon ko

tang-dil kitne hain ab log zara dekho to

pi ke KHud toD diya karte hain paimanon ko

ek udasi ka jo 'alam hai hamare ghar mein

wo mayassar hai na sahra na bayabanon ko

ye adaen teri bach bach ke guzarne ki jo hain

aur diwana na kar den tere diwanon ko

aaj jo ghair hain kal dost bhi ho sakte hain

itni nafrat se na dekha karo beganon ko

kya Daraengi use gham ki hawaen 'arshad'

jis ne sine mein chhupa rakkha ho tufanon ko