جانے کیا ان کی نظر کہہ گئی دیوانوں کو

جانے کیا ان کی نظر کہہ گئی دیوانوں کو

اپنے ہاتھوں سے چھپائے ہیں گریبانوں کو

زندگی اب مری اس طرح بسر ہوتی ہے

حسرتیں جاگیں تو نیند آ گئی ارمانوں کو

تنگ دل کتنے ہیں اب لوگ ذرا دیکھو تو

پی کے خود توڑ دیا کرتے ہیں پیمانوں کو

اک اداسی کا جو عالم ہے ہمارے گھر میں

وہ میسر ہے نہ صحرا نہ بیابانوں کو

یہ ادائیں تری بچ بچ کے گزرنے کی جو ہیں

اور دیوانہ نہ کر دیں ترے دیوانوں کو

آج جو غیر ہیں کل دوست بھی ہو سکتے ہیں

اتنی نفرت سے نہ دیکھا کرو بیگانوں کو

کیا ڈرائیں گی اسے غم کی ہوائیں ارشدؔ

جس نے سینے میں چھپا رکھا ہو طوفانوں کو