جانتا ہوں میں ترے کتنے پرستاروں کو

جانتا ہوں میں ترے کتنے پرستاروں کو

زندگی چھو نہ سکے جو ترے رخساروں کو

جن فصیلوں پہ بہت دل کو بھروسا تھا انہیں

گرتے دیکھا تو پکارا تھا بہت یاروں کو

روشنی برق کرن پھول غزل چنگاری

اتنا آسان نہیں بھولنا دل داروں کو

ہم کو خوش فہمیٔ احساس نے زندہ رکھا

عمر بھر پھول سمجھتے رہے انگاروں کو

اب وہ پتھر ہے بلندی سے زمیں پر گر کر

چشم حیرت سے تکا کرتا ہے کہساروں کو

کوئی طوفان نہ رکھ دیں یہ فصیل و در میں

دیکھتے رہنا ذرا ملک کے معماروں کو

ہم مسافر ہیں ترے گھر میں مگر اے دنیا

جاوداں کر دیا ہم نے ترے نظاروں کو

وہ چلے جائیں جو پتھر کا جگر رکھتے ہیں

حال دل ہم نہ سنا پائیں گے دیواروں کو

سادگی دیکھ کے تیری مجھے ڈر لگتا ہے

چھو نہ لے تو کہیں جلتے ہوئے انگاروں کو

شام آتی ہے تو خاموش سمندر کے قریب

خوشبوئیں ڈھونڈھتی پھرتی ہیں خریداروں کو

خوبصورت ہے نئی قدروں کا نقشہ لیکن

گھر نہ گر جائے سنبھالے رہو دیواروں کو

عرش تک پہلے بس اتنی ہی رسائی تھی بشیرؔ

چھو لیا کرتے تھے ہم چاند کے رخساروں کو