jab aasman ka samjhe nahin ishaara tum

jab āsmān kā samjhe nahīñ ishāra tum

to phir zamīñ ko kahāñ rah sake gavāra tum

tumhārī ḳhalq kā sab se haqīr zarra ham

hamāre charḳh kā sab se hasīñ sitāra tum

ab is ke baa'd hameñ diid kī nahīñ hājat

nazar ke vāste ho āḳhirī nazāra tum

baḌhā ke qurbateñ bīmār kar diyā ham ko

ab aa ke haal bhī pūchho kabhī hamārā tum

tumhārī aag meñ jalte hue sarāpā ham

hamārī raakh se uThtā huā sharāra tum

tumhārī baat pe ham ko hañsī sī aatī hai

hamārā haal na pūchhā karo ḳhudārā tum

hamārā saath bahut mo'tabar nahīñ phir bhī

hamāre saath meñ karte raho guzāra tum

jab aasman ka samjhe nahin ishaara tum

to phir zamin ko kahan rah sake gawara tum

tumhaari KHalq ka sab se haqir zarra hum

hamare charKH ka sab se hasin sitara tum

ab is ke ba'd hamein did ki nahin hajat

nazar ke waste ho aaKHiri nazara tum

baDha ke qurbaten bimar kar diya hum ko

ab aa ke haal bhi puchho kabhi hamara tum

tumhaari aag mein jalte hue sarapa hum

hamari rakh se uThta hua sharara tum

tumhaari baat pe hum ko hansi si aati hai

hamara haal na puchha karo KHudara tum

hamara sath bahut mo'tabar nahin phir bhi

hamare sath mein karte raho guzara tum