jab aql ne kar Dala jazbaat se samjhauta

jab aql ne kar Daalā jazbāt se samjhauta

ham kyuuñ na kareñ apne hālāt se samjhauta

jiine ke liye āḳhir karnā hī paḌā mujh ko

din raat kī gardish meñ din raat se samjhauta

hālāt badalne meñ kuchh der nahīñ lagtī

behtar hai abhī kar leñ hālāt se samjhauta

jab us ne jhalak dekhī pastī meñ bulandī kī

sūraj ne kiyā baḌh kar zarrāt se samjhauta

āsān nahīñ apnī auqāt samajh lenā

mushkil hai bahut apnī auqāt se samjhauta

kī yuuñ to mire nafs-e-sarkash ne bahut koshish

TuuTā na mire sar kā sajdāt se samjhauta

har samt fazāoñ se barse to lahū barse

ye kis ne kiyā chhup kar barsāt se samjhauta

jab dil ke taqāzoñ ko ḳhud aql hī Thukrā de

tab ho bhī to kaise ho jazbāt se samjhauta

hālāt ne samjhauta ai 'sāz' kiyā mujh se

maiñ ne na kiyā apne hālāt se samjhauta

jab aql ne kar Dala jazbaat se samjhauta

hum kyun na karen apne haalat se samjhauta

jine ke liye aaKHir karna hi paDa mujh ko

din raat ki gardish mein din raat se samjhauta

haalat badalne mein kuchh der nahin lagti

behtar hai abhi kar len haalat se samjhauta

jab us ne jhalak dekhi pasti mein bulandi ki

suraj ne kiya baDh kar zarraat se samjhauta

aasan nahin apni auqat samajh lena

mushkil hai bahut apni auqat se samjhauta

ki yun to mere nafs-e-sarkash ne bahut koshish

TuTa na mere sar ka sajdat se samjhauta

har samt fazaon se barse to lahu barse

ye kis ne kiya chhup kar barsat se samjhauta

jab dil ke taqazon ko KHud aql hi Thukra de

tab ho bhi to kaise ho jazbaat se samjhauta

haalat ne samjhauta ai 'saz' kiya mujh se

main ne na kiya apne haalat se samjhauta