jab bhi teri qurbat ke kuchh imkan nazar aae

Sadique Naseem

jab bhi teri qurbat ke kuchh imkan nazar aae

Sadique Naseem

MORE BYSadique Naseem

    jab bhī tirī qurbat ke kuchh imkāñ nazar aa.e

    ham ḳhush hue itne ki pareshāñ nazar aa.e

    dekhūñ to har ik husn meñ jhalkeñ tire andāz

    sochūñ to faqat gardish-e-daurāñ nazar aa.e

    TuuTā jo fusūn-e-nigah-e-shauq to dekhā

    sahrā the jo nashshe meñ gulistāñ nazar aa.e

    kāñToñ ke diloñ meñ bhī vahī zaḳhm the lekin

    phūloñ ne sajā.e to numāyāñ nazar aa.e

    ik ashk bhī nazr-e-ġham-e-jānāñ ko nahīñ paas

    ham aaj bahut be-sar-o-sāmāñ nazar aa.e

    jo rāh-e-tamannā ke har ik moḌ pe chup the

    jab daar pe pahuñche to ġhazal-ḳhvāñ nazar aa.e

    kyā jāniye kyā ho gayā arbāb-e-nazar ko

    jis shahr ko dekheñ vahī vīrāñ nazar aa.e

    kyā ruup nigāhoñ meñ rachā baiThe ki in ko

    gulshan nazar aa.e na bayābāñ nazar aa.e

    ik umr se is moḌ pe baiThe haiñ jahāñ par

    ik pal guzarnā bhī na āsāñ nazar aa.e

    'sādiq' nigāhoñ ko Thahrāv na mujrim

    ā.īne har ik daur meñ hairāñ nazar aa.e

    jab bhi teri qurbat ke kuchh imkan nazar aae

    hum KHush hue itne ki pareshan nazar aae

    dekhun to har ek husn mein jhalken tere andaz

    sochun to faqat gardish-e-dauran nazar aae

    TuTa jo fusun-e-nigah-e-shauq to dekha

    sahra the jo nashshe mein gulistan nazar aae

    kanTon ke dilon mein bhi wahi zaKHm the lekin

    phulon ne sajae to numayan nazar aae

    ek ashk bhi nazr-e-gham-e-jaanan ko nahin pas

    hum aaj bahut be-sar-o-saman nazar aae

    jo rah-e-tamanna ke har ek moD pe chup the

    jab dar pe pahunche to ghazal-KHwan nazar aae

    kya jaaniye kya ho gaya arbab-e-nazar ko

    jis shahr ko dekhen wahi viran nazar aae

    kya rup nigahon mein racha baiThe ki in ko

    gulshan nazar aae na bayaban nazar aae

    ek umr se is moD pe baiThe hain jahan par

    ek pal ka guzarna bhi na aasan nazar aae

    'sadiq' ki nigahon ko hi Thahraw na mujrim

    aaine har ek daur mein hairan nazar aae

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY