جب بھی ان کے ہمیں انداز نظر یاد آئے

جب بھی ان کے ہمیں انداز نظر یاد آئے

دل پہ اک چوٹ لگی درد جگر یاد آئے

شب کو یاد آئے کبھی وقت سحر یاد آئے

ہم بھلاتے ہی رہے آپ مگر یاد آئے

آہ پھر ہونے لگی ایک خلش سی دل میں

ان کے مبہم سے اشارات نظر یاد آئے

ہائے کیا چیز محبت میں ہے مجبوری بھی

لاکھ چاہا وہ نہ یاد آئیں مگر یاد آئے

یوں تو یہ زیست تمہاری ہے خوشی سے لے لو

اشک رو کے نہ رکیں گے ہم اگر یاد آئے

اشک چھلکے کبھی ہونٹوں پہ مرے آئی ہنسی

جب وہ یاد آئے بہ انداز دگر یاد آئے

ہائے بس آنے ہی والی تھی ہنسی ہونٹوں پر

مجھ کو گزرے ہوئے ایام مگر یاد آئے

جب بھی اے شوقؔ ذرا دل کو سکوں ملنے لگا

ہم کو اس شوق کے انداز نظر یاد آئے