jab kabhi uski yaad aai hai

jab kabhī us kī yaad aa.ī hai

sau bahāreñ jilau meñ laa.ī hai

ho na ho us kī yaad aa.ī hai

umr-e-rafta ko saath laa.ī hai

bāda-e-ishq kā surūr na pūchh

us ne pī kar mujhe pilā.ī hai

kaash mil jaa.e phir gañvāne ko

zindagī ham ne jo gañvā.ī hai

mujh ko ehsās-e-rang-o-bū na huā

yuuñ bhī aksar bahār aa.ī hai

tābish-e-mehr-o-māh hai phīkī

jab se vus.at nazar ne paa.ī hai

tere bandoñ ko kyā huā yā-rab

tujh se da.avā-e-āshnā.ī hai

us se ham dād-ḳhvāh-e-ulfat haiñ

jo faqat mahv-e-ḳhud-numā.ī hai

lāla-o-gul meñ DhūñDhne vaalo

us ne sūrat kabhī dikhā.ī hai

shikva-e-nārasī-o-nākāmī

e'tirāf-e-shikasta-pā.ī hai

jab kabhi us ki yaad aai hai

sau bahaaren jilau mein lai hai

ho na ho us ki yaad aai hai

umr-e-rafta ko sath lai hai

baada-e-ishq ka surur na puchh

us ne pi kar mujhe pilai hai

kash mil jae phir ganwane ko

zindagi hum ne jo ganwai hai

mujh ko ehsas-e-rang-o-bu na hua

yun bhi aksar bahaar aai hai

tabish-e-mehr-o-mah hai phiki

jab se wusat nazar ne pai hai

tere bandon ko kya hua ya-rab

tujh se dawa-e-ashnai hai

us se hum dad-KHwah-e-ulfat hain

jo faqat mahw-e-KHud-numai hai

lala-o-gul mein DhunDhne walo

us ne surat kabhi dikhai hai

shikwa-e-narasi-o-nakaami

e'tiraf-e-shikasta-pai hai