jab kabhi zaKHm shanasai ke bhar jate hain

jab kabhī zaḳhm shanāsā.ī ke bhar jaate haiñ

us kī galiyoñ se guzarte hue ghar jaate haiñ

jo zarūrī thā vahī bhūlnā ham bhuul ga.e

rāsta band agar ho to kidhar jaate haiñ

aur to ḳhauf nahīñ ham ko kisī kā lekin

koī apnā sā nazar aa.e to Dar jaate haiñ

kisī tūfān kī afvāh uḌātā hai koī

aur ham Dar ke kināre pe utar jaate haiñ

jaan de kar bhī tirā vā'da nibhāne vaale

tere haq meñ koī achchhā nahīñ kar jaate haiñ

sab ke kahne pe bahut hausla karte haiñ to ham

had se had us ke barābar se guzar jaate haiñ

Thiik se zaḳhm kā andāza kiyā hai kis ne

bas sunā thā ki bichhaḌte haiñ to mar jaate haiñ

ham bichhaḌ kar bhī jiyeñge ye tasavvur hī na thā

kyā ḳhabar thī ki ye lamhe bhī guzar jaate haiñ

raah chalte jo kuchh ik pal ko nazar aa.e the

qurbateñ hoñ to vahī rang Thahar jaate haiñ

jaane kyoñ sochtā rahtā huuñ musalsal jis ko

zehn se us ke ḳhad-o-ḳhāl utar jaate haiñ

ab to har zaḳhm nayā ek na.ī rāhat hai

ek baar aa ke kahīñ aise hunar jaate haiñ

jab kabhi zaKHm shanasai ke bhar jate hain

us ki galiyon se guzarte hue ghar jate hain

jo zaruri tha wahi bhulna hum bhul gae

rasta band agar ho to kidhar jate hain

aur to KHauf nahin hum ko kisi ka lekin

koi apna sa nazar aae to Dar jate hain

kisi tufan ki afwah uData hai koi

aur hum Dar ke kinare pe utar jate hain

jaan de kar bhi tera wa'da nibhane wale

tere haq mein koi achchha nahin kar jate hain

sab ke kahne pe bahut hausla karte hain to hum

had se had us ke barabar se guzar jate hain

Thik se zaKHm ka andaza kiya hai kis ne

bas suna tha ki bichhaDte hain to mar jate hain

hum bichhaD kar bhi jiyenge ye tasawwur hi na tha

kya KHabar thi ki ye lamhe bhi guzar jate hain

rah chalte jo kuchh ek pal ko nazar aae the

qurbaten hon to wahi rang Thahar jate hain

jaane kyon sochta rahta hun musalsal jis ko

zehn se us ke KHad-o-KHal utar jate hain

ab to har zaKHm naya ek nai rahat hai

ek bar aa ke kahin aise hunar jate hain