jab raat suhani hoti hai aur raqs mein tare hote hain

jab raat suhānī hotī hai aur raqs meñ taare hote haiñ

us vaqt mohabbat ke lamhe kuchh aur bhī pyāre hote haiñ

kuchh ḳhud se lipaT kar rote haiñ kuchh rote haiñ auroñ ke ġham meñ

vo dard ke maare hote haiñ ye zarf ke maare hote haiñ

ik aisī manzil aatī hai ehsās ke nāzuk lamhoñ meñ

jab dekhne vaalā koī na ho be-tāb nazāre hote haiñ

jab dasht-navardī ke baa.is kuchh zauq-e-safar baḌh jaatā hai

duzdīda nigāheñ uThtī haiñ nādīda ishāre hote haiñ

sach kahnā zabāñ se mushkil hai sach likhnā qalam se nā-mumkin

iz.hār-e-sadāqat khel nahīñ lafzoñ meñ sharāre hote haiñ

girdāb meñ aa jaatā hai 'ziyā' jab koī safīna qismat se

maujoñ meñ talātum hotā hai aur duur kināre hote haiñ

jab raat suhani hoti hai aur raqs mein tare hote hain

us waqt mohabbat ke lamhe kuchh aur bhi pyare hote hain

kuchh KHud se lipaT kar rote hain kuchh rote hain auron ke gham mein

wo dard ke mare hote hain ye zarf ke mare hote hain

ek aisi manzil aati hai ehsas ke nazuk lamhon mein

jab dekhne wala koi na ho be-tab nazare hote hain

jab dasht-nawardi ke bais kuchh zauq-e-safar baDh jata hai

duzdida nigahen uThti hain nadida ishaare hote hain

sach kahna zaban se mushkil hai sach likhna qalam se na-mumkin

izhaar-e-sadaqat khel nahin lafzon mein sharare hote hain

girdab mein aa jata hai 'ziya' jab koi safina qismat se

maujon mein talatum hota hai aur dur kinare hote hain