jab se be-rang sa kuchh ru-e-zamin ho gaya hai

jab se be-rang sā kuchh rū-e-zamīñ ho gayā hai

āsmāñ pahle se kuchh aur hasīñ ho gayā hai

haiñ tasarruf meñ tire ḳhākī-o-nūrī donoñ

phir bhī nāpāk bahut farsh-e-zamīñ ho gayā hai

'aam jis din se huī banda-navāzī us kī

har koī shāmil-e-as.hāb-e-yamīñ ho gayā hai

maslahat is meñ hai kyā ye to ḳhudā hī jaane

vo bahar-hāl bahut ham se qarīñ ho gayā hai

'aql kahtī hai yahāñ amn hai chāroñ jānib

dil ye kahtā hai nahīñ kuchh to kahīñ ho gayā hai

tund kyoñ itnā ḳhudā jaane hai lahja merā

vo ġhazal sun ke mirī chīñ-ba-jabīñ ho gayā hai

faisla aage jo kuchh hogā so hogā 'najmī'

hashr to apnā jo honā thā yahīñ ho gayā hai

jab se be-rang sa kuchh ru-e-zamin ho gaya hai

aasman pahle se kuchh aur hasin ho gaya hai

hain tasarruf mein tere KHaki-o-nuri donon

phir bhi napak bahut farsh-e-zamin ho gaya hai

'am jis din se hui banda-nawazi us ki

har koi shamil-e-ashab-e-yamin ho gaya hai

maslahat is mein hai kya ye to KHuda hi jaane

wo bahar-haal bahut hum se qarin ho gaya hai

'aql kahti hai yahan amn hai chaaron jaanib

dil ye kahta hai nahin kuchh to kahin ho gaya hai

tund kyon itna KHuda jaane hai lahja mera

wo ghazal sun ke meri chin-ba-jabin ho gaya hai

faisla aage jo kuchh hoga so hoga 'najmi'

hashr to apna jo hona tha yahin ho gaya hai