جب تلک اے دوست میری زندگی چلتی رہے

جب تلک اے دوست میری زندگی چلتی رہے

چاہتا ہوں ساتھ تیرے دوستی چلتی رہے

جس طرح یہ خامشی اب ساتھ چلتی ہے مرے

ٹھیک ویسے ساتھ تیرے ہر خوشی چلتی رہے

چھوڑ کر تم جا چکے ہو پھر بھی ہم زندہ تو ہیں

یعنی کشتی رک بھی جائے پر ندی چلتی رہے

قہقہوں سے رابطہ ہو اور تیرا غم بھی ہو

بارشوں میں بھیگ کر بھی یہ گھڑی چلتی رہے

اتفاقاً گر کہیں وہ مل گئے تو اے خدا

آنکھ نم ہو جائے میری پر ہنسی چلتی رہے

اب تمہارے بعد میری زندگی میں کیا بچا

تیرگی ہی تیرگی ہے تیرگی چلتی رہے