جب تری یاد میں مچلتا ہے

جب تری یاد میں مچلتا ہے

دل سنبھالے نہیں سنبھلتا ہے

چشم پر نم پہ اس کی حیراں ہوں

کیسے پتھر کا دل پگھلتا ہے

اس میں آیا ترے شباب کا رنگ

تیرے ہاتھوں جو جام ڈھلتا ہے

مجھ تک آنے کی راہ روشن ہے

نہ جلے شمع دل تو جلتا ہے

کیوں پتنگے کو شمع کی ہے تلاش

جلنے والا تو یوں ہی جلتا ہے

دور مے پر نگاہ ہے کس کی

مست آنکھوں کا دور چلتا ہے

دل میں میرے کہاں اندھیرا ہے

آرزو کا چراغ جلتا ہے

تم کو آئے کہ یا نہ آئے راس

وقت تو کروٹیں بدلتا ہے

سلسلے آرزو کے چلتے ہیں

دل کا ارمان کب نکلتا ہے

جیسی تیری نظر بدلتی ہے

ویسے دنیا کا رخ بدلتا ہے

لڑکھڑایا تو پا گیا منزل

جو بھی سنبھلا ہے ہاتھ ملتا ہے

جذبۂ دشمنی بھی آج حبیبؔ

پہلوئے دوستی میں پلتا ہے