jab wo mere qarib se hans kar guzar gae

jab vo mire qarīb se hañs kar guzar ga.e

kuchh ḳhaas dostoñ ke bhī chehre utar ga.e

vo hañs diye to raat sañvartī chalī ga.ī

zulfeñ bikher diiñ to ujāle nikhar ga.e

afsos Dūbne kī tamanna hī rah ga.ī

tūfān zindagī meñ jo aa.e guzar ga.e

kashtī koī Dubo ke subuk-dosh ho gayā

ilzām jis qadar the vo tūfāñ ke sar ga.e

koī hameñ batā.e ki ham kyā javāb deñ

manzil ye pūchhtī hai ki sāthī kidhar ga.e

hālāñki un ko dekh ke palTī hī thī nazar

mahsūs ye huā ki zamāne guzar ga.e

dair-o-haram meñ haiñ na kisī anjuman meñ haiñ

dīvāne ai 'mushīr' na jaane kidhar ga.e

jab wo mere qarib se hans kar guzar gae

kuchh KHas doston ke bhi chehre utar gae

wo hans diye to raat sanwarti chali gai

zulfen bikher din to ujale nikhar gae

afsos Dubne ki tamanna hi rah gai

tufan zindagi mein jo aae guzar gae

kashti koi Dubo ke subuk-dosh ho gaya

ilzam jis qadar the wo tufan ke sar gae

koi hamein batae ki hum kya jawab den

manzil ye puchhti hai ki sathi kidhar gae

haalanki un ko dekh ke palTi hi thi nazar

mahsus ye hua ki zamane guzar gae

dair-o-haram mein hain na kisi anjuman mein hain

diwane ai 'mushir' na jaane kidhar gae