jabin par kyun shikan hai ai jaan munh hai ghusse se lal kaisa

jabīn par kyuuñ shikan hai ai jaan muñh hai ġhusse se laal kaisā

hazār bāteñ hoñ ek haiñ phir bhalā ye bāham malāl kaisā

nahīñ hai ab tāb-e-dard-e-furqat kahāñ kī izzat kahāñ kī ġhairat

haiñ mubtalā apne haal meñ ham kisī kā is dam ḳhayāl kaisā

batāo mujh ko ye kyā huā hai ye kaun sā dard-e-lā-davā hai

ye kyuuñ mirā dam ulajh rahā hai hai ḳhud-baḳhud jī niDhāl kaisā

tamām aalam huā jo shaidā to kuchh ta.ajjub nahīñ hai is kā

but-e-sitamgār tujh ko baḳhshā ḳhudā ne husn-o-jamāl kaisā

gunah se serī huī nahīñ hai ye kahte haiñ sab ajal qarīñ hai

qalaq meñ har dam dil-e-hazīñ hai ki hogā apnā ma.aal kaisā

ye us sitamgar se koī kah de marīz-e-furqat kī ab ḳhabar le

haiñ kaT rahī zindagī kī ghaḌiyāñ kahāñ kā din māh-o-sāl kaisā

ġhazab se hai vaañ jo chiiñ jabīñ par hujūm-e-ġham hai dil-e-hazīñ par

lahū ke dhabbe haiñ āstīñ par hai dāman ashkoñ se laal kaisā

havas hai har ek jī kī jī meñ hue jo ġhash vasl kī ḳhushī meñ

tamām shab guzrī be-ḳhudī meñ javāb kaisā savāl kaisā

jahān chhānā paḌā hai kab kā falak pe vahshat kā ab hai shohrā

kahāñ kā maġhrib kahāñ kā mashriq junūb kaisā shumāl kaisā

vo mehr huuñ maiñ huā jo tāle.a to ik zamāne ne ḳhaak uḌaa.ī

chamakne dete nahīñ haiñ bad meñ uruuj kaisā zavāl kaisā

'habīb' kar ke butoñ kī ulfat abhī se ye hijr kī shikāyat

rahegā ab hashr tak ye jhagḌā yahāñ bhalā infisāl kaisā

jabin par kyun shikan hai ai jaan munh hai ghusse se lal kaisa

hazar baaten hon ek hain phir bhala ye baham malal kaisa

nahin hai ab tab-e-dard-e-furqat kahan ki izzat kahan ki ghairat

hain mubtala apne haal mein hum kisi ka is dam KHayal kaisa

batao mujh ko ye kya hua hai ye kaun sa dard-e-la-dawa hai

ye kyun mera dam ulajh raha hai hai KHud-baKHud ji niDhaal kaisa

tamam aalam hua jo shaida to kuchh tajjub nahin hai is ka

but-e-sitamgar tujh ko baKHsha KHuda ne husn-o-jamal kaisa

gunah se seri hui nahin hai ye kahte hain sab ajal qarin hai

qalaq mein har dam dil-e-hazin hai ki hoga apna maal kaisa

ye us sitamgar se koi kah de mariz-e-furqat ki ab KHabar le

hain kaT rahi zindagi ki ghaDiyan kahan ka din mah-o-sal kaisa

ghazab se hai wan jo chin jabin par hujum-e-gham hai dil-e-hazin par

lahu ke dhabbe hain aastin par hai daman ashkon se lal kaisa

hawas hai har ek ji ki ji mein hue jo ghash wasl ki KHushi mein

tamam shab guzri be-KHudi mein jawab kaisa sawal kaisa

jahan chhana paDa hai kab ka falak pe wahshat ka ab hai shohra

kahan ka maghrib kahan ka mashriq junub kaisa shumal kaisa

wo mehr hun main hua jo talea to ek zamane ne KHak uDai

chamakne dete nahin hain bad mein uruj kaisa zawal kaisa

'habib' kar ke buton ki ulfat abhi se ye hijr ki shikayat

rahega ab hashr tak ye jhagDa yahan bhala infisal kaisa