jafā-e-yār ko ham lutf-e-yār kahte haiñ
ḳhizāñ ko apnī zabāñ meñ bahār kahte haiñ
vo ek sunte nahīñ ham hazār kahte haiñ
magar fasāna bahar-e'tibār kahte haiñ
zamāna qaid ko samjhe hue hai āzādī
kisī ke jabr ko ham iḳhtiyār kahte haiñ
qafas meñ rah ke mujhe ye bhī imtiyāz nahīñ
kise ḳhizāñ kise fasl-e-bahār kahte haiñ
nafas nafas jo payām-e-hayāt detī hai
usī nazar ko taġhāful-shi.ār kahte haiñ
tumhāre husn kī jis dil ko raushnī na mile
ham aise dil ko charāġh-e-mazār kahte haiñ
tirī nigāh-e-taġhāful se dil ne paayā hai
vo ek kaif jise intizār kahte haiñ
mohabbat aur mohabbat meñ ārzū-e-visāl
ham is bahār ko nañg-e-bahār kahte haiñ
ḳhadañg-e-nāz abhī hai tumhārī chuTkī meñ
na jaane log mujhe kyuuñ 'figār' kahte haiñ
jafa-e-yar ko hum lutf-e-yar kahte hain
KHizan ko apni zaban mein bahaar kahte hain
wo ek sunte nahin hum hazar kahte hain
magar fasana bahar-e'tibar kahte hain
zamana qaid ko samjhe hue hai aazadi
kisi ke jabr ko hum iKHtiyar kahte hain
qafas mein rah ke mujhe ye bhi imtiyaz nahin
kise KHizan kise fasl-e-bahaar kahte hain
nafas nafas jo payam-e-hayat deti hai
usi nazar ko taghaful-shiar kahte hain
tumhaare husn ki jis dil ko raushni na mile
hum aise dil ko charagh-e-mazar kahte hain
teri nigah-e-taghaful se dil ne paya hai
wo ek kaif jise intizar kahte hain
mohabbat aur mohabbat mein aarzu-e-visal
hum is bahaar ko nang-e-bahaar kahte hain
KHadang-e-naz abhi hai tumhaari chuTki mein
na jaane log mujhe kyun 'figar' kahte hain
Source:
Harf-o-nava (Pg. 60)
-
Author:
umesh bahadur sirivasto figaar unnavi
-
- Edition: 2001
- Publisher: Figaar Unnavi
- Year of Publication: 2001
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.