jagmag jagmag uski aankhen mera sina julta tha

jagmag jagmag us kī āñkheñ merā siina jultā thā

chāñd hamāre aage aage mash.al le kar chaltā thā

rāhguzar thī mahkī mahkī ek tilismī ḳhushbū se

tez havā meñ us kā āñchal kyā kyā rañg badaltā thā

jhilmil jhilmil karte sapne pahlī pahlī chāhat ke

sīna-e-shab par is ke qadam the yā ḳhurshīd nikaltā thā

phuul sā chehra dahkā dahkā zulfoñ kī shādābī meñ

ālam-e-imkāñ chupke chupke apnī āñkheñ maltā thā

surḳh laboñ kī pañkhuḌiyāñ jab haule se khil jaatī thiiñ

qaus-e-quzah kā resham un par shabnam-vār machaltā thā

ek parinda chīḳh rahā thā masjid ke mīnāre par

duur kahīñ gañgā ke kināre aas kā sūraj Dhaltā thā

shahr-e-vafā meñ jā nikle the ham bhī nuur se milne ko

vo dīvāna ik parchhā.īñ ke hamrāh Tahaltā thā

jagmag jagmag us ki aankhen mera sina julta tha

chand hamare aage aage mashal le kar chalta tha

rahguzar thi mahki mahki ek tilismi KHushbu se

tez hawa mein us ka aanchal kya kya rang badalta tha

jhilmil jhilmil karte sapne pahli pahli chahat ke

sina-e-shab par is ke qadam the ya KHurshid nikalta tha

phul sa chehra dahka dahka zulfon ki shadabi mein

aalam-e-imkan chupke chupke apni aankhen malta tha

surKH labon ki pankhuDiyan jab haule se khil jati thin

qaus-e-quzah ka resham un par shabnam-war machalta tha

ek parinda chiKH raha tha masjid ke minare par

dur kahin ganga ke kinare aas ka suraj Dhalta tha

shahr-e-wafa mein ja nikle the hum bhi nur se milne ko

wo diwana ek parchhain ke hamrah Tahalta tha