jahan dar tha wahan diwar kyun hai

jahāñ dar thā vahāñ dīvār kyuuñ hai

alag naqshe se ye me.amār kyuuñ hai

ḳhudā āzād thā hākim kī had se

ḳhudā ke shahr meñ sarkār kyuuñ hai

bahut āsān hai mil-jul ke bahnā

nadī aur dhaar meñ paikār kyuuñ hai

hazāroñ rañg ke phūloñ se khiñch kar

banā hai shahd to bekār kyuuñ hai

kisī bhī samt se aa kar parinde

sajā.eñ jhiil to āzār kyuuñ hai

tirī mahfil meñ sab baiThe haiñ aa kar

hamārā baiThnā dushvār kyuuñ hai

banā kar rakh tū ghar achchhā rahegā

tū mālik ban kirā.e-dār kyuuñ hai

tumhāre saath ham aage baḌhe the

hamārī piiTh par talvār kyuuñ hai

ḳhudā se kyā raqābat hai sanam kī

rah-e-masjid nazar meñ ḳhaar kyuuñ hai

ibārat meñ na kar tahrīf bejā

hamāre naam se bezār kyuuñ hai

parinde ko jo mauqa do dikhā de

bañdhe par kā safar lāchār kyuuñ hai

paḌosī ho to phal yā phuul laate

tumhāre haath meñ hathiyār kyuuñ hai

zamīñ phailī huī hai āsmāñ tak

bas ik TukḌe pe yuuñ takrār kyuuñ hai

jahan dar tha wahan diwar kyun hai

alag naqshe se ye meamar kyun hai

KHuda aazad tha hakim ki had se

KHuda ke shahr mein sarkar kyun hai

bahut aasan hai mil-jul ke bahna

nadi aur dhaar mein paikar kyun hai

hazaron rang ke phulon se khinch kar

bana hai shahd to bekar kyun hai

kisi bhi samt se aa kar parinde

sajaen jhil to aazar kyun hai

teri mahfil mein sab baiThe hain aa kar

hamara baiThna dushwar kyun hai

bana kar rakh tu ghar achchha rahega

tu malik ban kirae-dar kyun hai

tumhaare sath hum aage baDhe the

hamari piTh par talwar kyun hai

KHuda se kya raqabat hai sanam ki

rah-e-masjid nazar mein KHar kyun hai

ibarat mein na kar tahrif beja

hamare nam se bezar kyun hai

parinde ko jo mauqa do dikha de

bandhe par ka safar lachaar kyun hai

paDosi ho to phal ya phul late

tumhaare hath mein hathiyar kyun hai

zamin phaili hui hai aasman tak

bas ek TukDe pe yun takrar kyun hai