jahan hai maktab-e-hasti sabaq hai chup rahna

jahāñ hai maktab-e-hastī sabaq hai chup rahnā

baḌā gunāh yahāñ hai alif se be kahnā

shab-e-firāq meñ saa.e se Dar ke kahtā huuñ

ajī ye raat Darānī hai jāgte rahnā

chaman meñ phuul khile baaġh meñ bahār aa.ī

urūs-e-dahr ne goyā pahan liyā gahnā

hamārī āh-o-bakā se hai jism-e-shauq qavī

ye haath bāyāñ hai apnā vo haath hai dahnā

fuġhān-e-bulbul-e-shaidā na jāniye is ko

bajā rahā hai koī sehn-e-bāġh meñ shahna

ġham-e-firāq meñ ai āsmāñ nahīñ mauqūf

vo jo suhā.eñ mujhe mujh ko har tarah sahnā

nikāl de ki hai aise meñ jū-e-ashk-e-ravāñ

burā hai baat kā ai chashm-e-dil meñ le rahnā

galī meñ yaar kī ho yā kisī ḳharābe meñ

hameñ to hashr ke din tak kahīñ pe mar rahnā

asar bhī 'shād' ke sheroñ meñ hai matānat bhī

ye kohna-mashq haiñ in kī ġhazal kā kyā kahnā

jahan hai maktab-e-hasti sabaq hai chup rahna

baDa gunah yahan hai alif se be kahna

shab-e-firaq mein sae se Dar ke kahta hun

aji ye raat Darani hai jagte rahna

chaman mein phul khile bagh mein bahaar aai

urus-e-dahr ne goya pahan liya gahna

hamari aah-o-baka se hai jism-e-shauq qawi

ye hath bayan hai apna wo hath hai dahna

fughan-e-bulbul-e-shaida na jaaniye is ko

baja raha hai koi sehn-e-bagh mein shahna

gham-e-firaq mein ai aasman nahin mauquf

wo jo suhaen mujhe mujh ko har tarah sahna

nikal de ki hai aise mein ju-e-ashk-e-rawan

bura hai baat ka ai chashm-e-dil mein le rahna

gali mein yar ki ho ya kisi KHarabe mein

hamein to hashr ke din tak kahin pe mar rahna

asar bhi 'shad' ke sheron mein hai matanat bhi

ye kohna-mashq hain in ki ghazal ka kya kahna